قصة السلاويين فميريكان قبل من منصف السلاوي

مراد الرايس، لي الإسم الأصلي ديالو بالهولندية هو Jan Janszoon van Haarlem، الأغلبية فينا كيعرفوا قصة مراد الرايس و لكن نديرو عليها واحد المرور صغير و ندوزو للشخصية الأهم فهاد القصة.
مراد الرايس تولد فمدينة هارلم الهولندية، خدم قرصان باش يحارب الإمبراطورية الإسبانية لي كانت فحرب مع بلادو،حرب الاستقلال الهولندية المعروفة.
كان كيشفر منهم السلاح والمؤونة باش يعطيها لبلادو و هكذا واحد النهار فواحد الغزوة غيديرها حدا جزر الكناري عام 1618، غيشدوه القراصنة ديال سلا، هاد المدينة لي إستقلات كإمارة عن الحكم السعدي، و بداو يجيو ليها المهاجرين المهجَّرين من اسبانيا (الموريسكيين والهورناتشيين و القراصنة الموريسكيين لي كانو فمدينة المهدية بعد احتلالها من الإسبان ) و من بعد ولات كيان شبه جمهوري مستقل تماما فعام 1614 بقيادة إبراهيم بارغاس. تشد “يان يانسن ڤان هارلم” و جابوه لسلا و عطاوه 3 الخيارات: تفدي راسك بالفلوس، أو ترجع لبلادك على رجليك، أو تسلم..و هادي خلاصة النقاش لي طرا :
يان يانسن : شنو هاد الإسلام؟
قراصنة دسلا: هو كدا وكدا
يان يانسن : مرحبا أنا مسلم
قراصنة د سلا: تقدر ترجع لبلادك راك حر دابا، أو الا بغيتي تدخل معانا فمرحبا.
يان يانسن : أنا أصلا عزيز عليا نشفر دوك ولاد الحرام ديال السبليون، أنا معاكم مكاين فين نمشي.
يان يانسن ولات سميتو مراد الرايس، ولا قرصان واعر و بعد صراعات داخلية مابين السكان الموريسكيين والهورناتشيين تعين مراد الرايس كزعيم لجمهورية بورقراق السلاوية و دارمهام سياسية ودبلوماسية مهمة بزاف لصالح المغرب و خدم كنائب للسلطان فجمهورية سلا. تزوج مراد بمغربية مسلمة و ولد معاها 4 الولاد، واحد منهم سميتو أنطوني. هاد أنطوني هو لي داير عليه الفيلم. الإسم المعروف بيه فالتاريخ هو Anthony Janszoon van Salee أو أنطوني السلاوي.
هاد أنطوني مشا لأمستردام تزوج من ألمانية و مشا للعالم الجديد عام 1630 (قبل من تأسيس ميريكان) حطاتو السفينة فمستعمرة هولندية سميتها هولندا الجديدة New Netherlands. هاد المستعمرة كانت شادة مساحة كبيرة من ولاية نيويورك لبينسيلفينيا. أنطوني بالفلوس لي عطاه باه مراد الرايس، بدا كيشري فالأراضي فمدينة New Amsterdam لي شدوها الانغليز عام 1664 و سماوها نيو يورك New York City. هاد المغربي أنطوني السلاوي ولا أكبر مالك أراضي فمدينة نيويورك و أول واحد يملك أرض فConey Island و مساحات شاسعة فبزاف د الولايات. الجيران ديال أنطوني و الكنيسة لي فالمدينة فاش ساكن كانوا كيشوفوه كمسيحي غير متدين و بغاو يطردوه من المدينة، الروايات كتقول بلي أنطوني بقى مسلم متخفي و كان عندو واحد القرآن لي واحد من السلالة ديالو باعو فالقرن ال20 بلا ميعرف القيمة ديال أشنو باع.
بزاف العائلات المرموقة فميريكان على مر التاريخ تزوجو من عائلة السلاوي van Salee وتخلط الدم ديالهم فسلالة عطاتنا :
عائلة بحال Vanderbilt family من أعرق العائلات الامريكية لي بناو سكك الحديد فميريكان و الثروة ديالهم لا تحد.
عائلة الWhitney : فيها سياسيين كبار و رجال اعمال
من السلالة ديالو كاين شخصيات بحال Humphrey Bogart لي ل مثل ففيلم كازابلانكا ( كيفاش ميريكاني حفيد حفيد حفيد ديال مغربي متل ففيلم سميتو الداربيضا ..ههه صدف التاريخ العجيبة)
زوجة الرئيس كينيدي Jacqueline Kennedy يعتقد كذلك انها من السلالة ديالو .
الدكتور Dr. John van Salee de Grasse كان اول طبيب من أصل إفريقي كيتم التعليم ديالو رسميًا كطبيب في الولايات المتحدة.
هادي قصة السلاويين فميريكان قبل من منصف السلاوي.
صورة الدكتور Dr. John van Salee de Grasse

اترك رد

لن يتم نشر عنوان بريدك الإلكتروني.