معركة القصر الكبير. مقدمة: السياق العام فاوروبا قبل المعركة

3 ديال القوى العظمى لعبو دور كبير فالمصير ديال أوروبا فالاعوام لي سبقت معركة القصر الكبير ف 4 غشت 1578 لي هو موضوع هاد المقال.

واحد من هاد القوى طبعا الملك د الصبليون Philip II لي الجيوش ديالو كانت لا تقاوم (كان الجيش الإسباني معروف بواحد الunits كيتسماو ب الTercios، خليط من صحاب الرماح و السيوف و البنادق. كانو واعرين فالمعارك ديك الوقت)، لي الأسطول البحري ديالو كان الأسطول الأساسي لي هزمو بيه العثمانيين فمعركة Lepanto ف 1571، لي الثروات ديالو من الذهب و الفضة من القارة الأمريكية غير محدودة و الأكبر فالتاريخ. و فأوروبا -من غير أسبانيا- كان كيحكم هولندا و بشكل مباشر او غير مباشر اطراف كبيرة من إيطاليا و الجزر المتوسطية فحال سردينيا، سيسيليا و البليار. و كيحتل كاع القارة الامريكية الجنوبية و الوسطى من غير البرازيل.

بهاد القوة كاملة كان كيواجه فرانسا المحكومة من اسرة Guise: الموت المفاجئ ديال Henry II الفرنسي ف 1559 خلات العرش الفرنسي فيد ولاد صغار ديال الأرملة ديالو Catherine de’ Medici المتعطشة للسلطة. Francis II، Charles IX، و Henry III هادو كاملين كانو ملوك فرنسيين ما عندهمش من القوة البدنية و المهارات لي يقدرو يحكمو بيها فالوقيتة لي فرانسا ديك الوقت كانت معولة بصح على ملوك يكونو capable. الطريقة باش Catherine de’ Medici بغات توصل للسلطة على أساس تحكم بسميت ولادها، خلات اسرة Guise تستغل الفرصة و تقاتل باش توصل للسلطة ضد اسرة بوربون، واخا اسرة Guise هوما كاثوليك ولكن كانو Anti Spanish، و واخا نوعا ما كانو أجانب (Lorrainers) قدرو يوصلو للسلطة باستغلال المشاعر الوطنية الفرنسية.

العداء ديال Guise للملكة الإنجليزية Elizabeth I (القوة الثالثة لي كتهمنا) كانت قوية. كانو كيشوفو Elizabeth I طفلة غير شرعية للملك Henry VIII من أمها Anne Boleyn، و وصلات للسلطة بالقوة و منعات Mary, Queen of Scots( كتبتها بلونغلي باش ماتغالطش مع الملكة Mary I ديال النكليز لي حكمات قبل اليزابيت) لي ابنة اخت الدوق ديالGuise من الوصول للعرش (الأم ديال ماري ملكة استكلندا هي من اسرة Guise تزوجات ملك جيمس الخامس الاسكتلندي) .
اسرة Guise لي كانو متخيلين بلي غادي يوسعو الاسرة ديالهم باش تشمل اسكتلندا و ايرلندا و إنجلترا و اللورين. هادشي لي رسم من بعد، السياسة ديال ايليزابيت: اي صديق لاسرة Guise هو عدوها و أي عدو ليهم هو صديقها.

(عارف رونتها فالشرح، نوضح كثر: ايليزابيت وصلات للحكم مور الملكة Mary I of England، لي هي الاخت ديالها و مرات الملك فيليب الثاني الاسباني. ماتت بلا وريث فحكمات ختها.
ملكة اسكتنلدا كان سميتها Mary of Guise مزوجة الملك السكوتلندي James V، ولدو بنت ههه Mary, Queen of Scots لي بقات كاثوليكية- تزوجات فرانسيس الثاني الملك الفرنسي- ولي من بعد غادي يكونو مؤامرات باش يطيحو ايليزابيث و تحكم هي فبلاصتها حيت كانت كنتشوف راسها عندها احقية بالعرش حيت جداها من باها كانت اخت هنري الثامن لي هو أب اليزابيت…..Shieet !!! هادشي ما تصدعوش راسكم بيه راني براسي تلفت ديال بصح فهاد الروينة، الموهيم: كان صداع على العرش زيد عليه الصداع بين الكاثوليك و البروتيستانت هادشي لي كيهمنا هنا)

دابا مادام Philip II الاسباني و Elizabeth I عندهم عدو واحد هو فرانسا، بالتالي خصهم يكونو متحالفين، و فسنوات الحكم اللولة ديالها داكشي لي كان. ورثاث ختها الملكة Mary I تحالف مع Philip II لي السفير ديالو فالنجليز عاونها توصل للعرش ولي عاونها باش البابا ما يكفرهاش (excommunication) فالسنوات الحضاش اللولة من حكمها. بقات فلول حذرة بزاف فعلاقتها مع Philip II فيليب و بقات كتأكد على السفير الاسباني بلي راها فعلا “كاثوليكية” و بلي مهتمة بالزواج بواحد من الcousins ديال فيليب ( الأرشدوق النمساوي).(الhouse of Habsburg كانو حاكمين النمسا و الصبليون).

الصداع بينها وبين الصبليون بدا على جوج د الأسباب: القرصنة و الدين. القراصنة النكليز ما خداوش اوامرهم من الملكة لي كانت فلول كدير جهدها باش تحبسهم. ولكن فاش السفن ديالهم كتوصل للموانئ د النكليز معمرة بالدهب و كاع الغنيمة لي سرقو من الصبليون، كانت كتاخد حقها ! دارت هكا بكل بساطة حيت كانت محتاجة للفلوس السبب لي كان غير مقنع لPhilip II. السبب الثاني الملاحقات لي كانت كدير ضد الكاثوليك لي مستقبل العرش ديالها كانت متوقف ديك الساع على الطرد ديالهم و القضاء عليهم. (مالت من بعد للبوتستانتية كليا )فيليب الثاني كواحد كاثوليكي مشتدد، وصل لقمة الغضب من الملكة الإنجليزية.
ولكن هاد الوقت كامل فيليب كان عارف بلي أي سوء علاقة مع ايليزابيث غادي يفيد غير اللGuides، الملكة ماري د اسكتلندا بالنسبة ليه هي الوريثة الوحيدة للعرش الإنجليزي.
داكشي علاش ساهم فتمويل مؤامرة ضد ايليزابيث المعروفة ب Ridolfi plot 1570-71 لي حاولو يطيحو ايليزابيت و يحطو فبلاصتها ماري ملكة اسكتلندا و زوجة الملك الفرنسي، هاد المؤامرة كانت مدفوعة بالغضب و ماكنش أي امل باش تنجح. فيليب بقا مبزرط مع ايليزابيث حتا وقعات ثورة دبلوماسية فواخر السبعينات(ديال 1500 ههه):
الGuises تحولو من أعداء لحلفاء معتمدين على الصبليون و هادشي خلا النكليز تخرج من لعبة الشطرنج لي كانت ديما كدير check لطموحات الGuises.

الثورة الدبلوماسية بدات بشوية فالمدبحة لي وقعات فباريس 23 غشت 1572 (مدبحة Bartholomew) لي غيرات الحرب الدينية ففرانسا من حرب بين جوج اسر د النبلاء(االGuise و الBourboun) – لي كانت كتشبه شوية لحرب الوردتين فالنكليز قرن قبل- الى حرب دينية ديال بصح. الGuises ولاو متزعمين “حملة صليبية” (التحالف الكاثوليكي) ماشي غير تيار سياسي. و الHuguenots(البروتيستانت الفرنسيين) لي فقدو أي لقب او اي سياسي ارستقراطي يدعمهم، بداو كيتقاتلو بجهد على ود بقاء الcalvinism ففرانسا. الGuises بداو كيميلو بسرعة لجهة فيليب لي كان ديك الساع هو بطل الكاثوليكية فالعالم ! الدون John النمساوي كيقاوم ضد الثوار الهولنديين البروتستانت حتا هو تاصل بالGuises و علم السفير الاسباني ففرانسا بالاتفاق الودي بيناتهم. فيليب ما ضيعش الفرصة و فشهور قليلة ف 8 ابريل 1578 تلاقا الدوق ديال Guise مع السفير الاسباني و الثورة الديبلوماسية كملات. قد ما الحرب الدينية ففرانسا تزادت تعصب قد ما الروابط بين فيليب و الGuise كتزاد تقوى.

(باش تفهمو كثر هاد الصراع قراو على French Wars of Religion بين 1562 و 1598، صراع ديني بين الكاثوليك الGuise و البروتيسناتنت البوربون لي من بعد ولاو كاثوليك… ما غنزيدش نرونكم كثر عوتاني)

الوضعية د ايليزابيث دابا ولات خطيرة و على الحافة. فيليب قدر يعتمد على الGuises وتهنا من الخطر من جيهت فرانسا غيخليه يركز كثر على كيفاش يطيح ايليزابيت و يجيب بلاصتها ماري.
بدا كيتهور فالسياسة ديالو، خصوصا مور ما احتل البرتغال ف 1580 (عاماين من بعد معركة القصر الكبير لي الموت ديال سيباتيان خلا العرش البرتغالي بلا وريث و فيليب ك خال د سيباسيتان قدر يشد الحكم و يوحد العرشين من مور حرب أهلية فالبرتغال.) و سيطر على الاسطول الكبير ديالها لي زادو لديالو.

فيليب هو و السفير ديالو Bernadino de Mendoza لعبو دور كبير فمؤامرة Throckmorton Plotف 1583 و كيفاش Throckmorton اعترف تحت التعذيب بلي كان كيتعامل مع الصبليون خلات اليزابيث تجري على السفير الاسباني فيناير 1584.
ولكن كانت خايفا تشعل حرب مع الصبليون واخا هكاك، رسلات السيد William Wade لمدريد باش زعما يشرح الدوافع ديالها… الخ، ولكن فيليب رفض يشوفو و قطع العلاقات الديبلوماسية مع النكليز. فالوقيتة لي الملك سيباستيان البرتغالي كان كيوجد لحرب ضد المغرب ، النكليز و الصبليون كانو غادين من حرب باردة لحرب حقيقية. هادشي لي كيفسر الرغبة الكبيرة د ايليزابيث تشري الsaltpetre (نترات البوتاسيوم: ملح كيتصايب بيه البارود) و حوايج خرين عند المغرب. (هاد الصفقة جايا الهضرة عليها فمقالات خرين).

العلاقات بين النكليز و الصبليون تعقدات مور ثورة الهولنديين، لي كانت خدامة من نهار فيليب كلس على العرش. المشاكل ديالهم كثيرة و زيد عليها طبقة نبلاء لي حاكمة كانت فاسدة و مفلسة و اضطهادهم للبروتيستانت، خلات الثورة تنوض .النبلاء تما ما قدروش يوقفوها، هادشي لي خلى الملك الإسباني رسل دوق Alva لهولندا مع جيش فيه 10 الاف ديال المحاربين القداما. الدوق تاهو رفع من الضرائب بشكل كبير زيد عليها علن ويليام الصامت كخارج على القانون هادشي كامل ازم الوضع كثر.
(وليام الصامت كان من خدام الحكام الاسبان فهولندا من بعد غيتور عليهم ويتزعم حرب الاستقلال الهولندية)

الملكة الإنجليزية واخا الثوار الهولتديين بروتستانت و ضد اعداءها لي هوما الصبليون، واخا هكاك ماكنتش كتحمل الكالفينين و كانت كتخاف تولي الجمهورية الهولندية من بعد قوة كبيرة اونفاص الفم ديال نهر الThames !!
داكشي علاش جرات على الهولنديين”الشفارة” من الموانئ النكليزية، الشي لي بطريقة غير مباشرة خلاتهم يشدو مدينة Brielle ف1572 والشي لي خلا الاسبان يزيدو يحقدو عليها. (جرات على الهولنديين من الموانئ ديالها صدقو يكقلبو على فين يخبيو 25 سفينة ديالهم ، صقدو بالزهر لقاو مناء Brielle خاوي من الاسبان و احتلوه و صدق للثوار الهولنديين ارض فهولندا مور من مدة كانو الاسبان صافي قربو يقضيو عليهم، هاد الحدث كيحتفلو بيه الهولنديين كل واحد ابريل).

من مور اغتيال ويليام الصامت 12 عام من بعد (ف1584) بدا كيبان بلي صافي الهولنديين غادي يرضخو لشروط الاسبان…
ايليزابيث دابا شافت بلي الخطر الاسباني غادي يكبر كثر و غيقرب ليها وهادشي ماخصوش يوقع. هنا بدلات سياستها مع الهولنديين و صيفطات جيش انجليزي يدعم الهولنديين تحت امرة Earl of Leicester.
هادشي خلا الصبليون يصفطو الArmada (محاولة غزو النكليز الشهيرة ف1588 لي انهزمو فيها ) و هادشي جا بالتزامن مع انتصار هنري النافاري ففرانسا (رجعو قراو على الFrench Wars of Religion) و الstabilization ديال الثورة فهولندا خلا الأمور تكاااااااالما فاوروبا.
بدا السلام يرجع بين الاسبان و الفرنسيين رسميا فمعاهدة Vervins ف1598 و سلام بين النكليز و الاسبان ف معاهدة لندن 1604 و اتفاق وقف اطلاق نار مدة ديالو 12 عام (هدنة) بين الهولنديين و الاسبان معاهدة Hague 1609.
و دابا العواصف الديبلوماسية لي كانت طارية فالوقيتة د الحملة السيباستيانية فالمغرب ، هدات و بردات بشكل كلي فالبداية د 1600.
مورها غتشعل ف 1618 ما يعرف بحرب الثلاتين سنة لي غتسالي ف1648 و تما فين رسميا استقلت هولندا وسالات الحروب الدينية و لأول مرة فصلح وستفاليا 1648 غيتم تأسيس ما عرف حاليا :الدولة الوطنية. هدا موضوع اخر على كل حال.

اترك رد

لن يتم نشر عنوان بريدك الإلكتروني.