السفارة المغربية ف النكَليز

وفد مغربي مشا لنكَليز فاصيف د 1600. لمهمة كانت سرية و لهدف ديالها ما معروف لتا شي حد فلمغرب، و موجدين ليها مزيان بزااف. رسميا، لهدف د لوفد لي غادي هو يشريو لاحجار لكريمة، و شدو لباطو و مشاو فاتجاه حلب فلول عاد دازو للنكليز باش ما يعيقوش الصبليون لي جواسيسهم كانو معمرين لمغرب.

لوفد كان مريسو واحد سميتو عبد لواحد بن مسعود بن محمد لعنوري، و رايس ثاني د لوفد واحد يقولو ليه لحاج موسى لي كان “كيفهم بزااف فداكشي د لاحجار لكريمة فحال الألماس و لياقوت..الخ و عبد لواحد كان كيهضر شوية صبليونية”. هذا وصف ديال واحد تاجر نكَليزي سميتو Jasper Thomson لي كان عارف من لول علاش جاي هاد لوفد بضبط حيت كان مصاحب مع واحد لمغربي كان مرافق لوفد كيطرجم ليهم، سميتو عبد الله دودار “رجل معقول بزاف ‘’ حسب وصف هاد تاجر نيت. دودار كيفهم صبليونية و طاليانية حيت اصلو مورسكي و فايت خدم عسكري مع صبليون فطاليان.

لوفد غيوصل ل Dover فغشت، و فشهر شتنبر عبد لواحد غادي يصيفط رسالة Memorandum للملكة ايليزابيث كيقترح فيها تحالف مغربي-نكَليزي ضد صبليون. سلطان حمد لمنصور كيواعد بلي غادي يوفر كولشي من لعسكر بسلاح و دخاير ديالهم ….الخ و غادي يوجد لمواني د لمغرب باش يكونو تحت تصرف لبحرية د نكَليز، و يخدمو بيهم بجوج فغزو للمستعمرات د اصبليون فميريكان. و كيزيد يشرح فرسالة بلي هاد لمستعمرات هي مصدر د لقوة ديالهم و بلي غزو مشترك ليهم غادي يضعفهم مزياااان.

حمد لمنصور كان واعي بزاف بحجم لمستعرات د اصبليون و لبرطقيز، و كان كيخطط من ديما ياخد شوية منهم يزيدهم على لمبراطورية ديالو، حيت فحال هاد لمستعمرات تقدر تخليه يدير تحالفات مع بزاف د دول. و كان عارف بلي نكَالزة يمكن عندهم طريق جديدة عاد تكتاشفت باش تبحر للهند بلا ما تواجه لبرتغال لي شادين ديك طريق تقليدية لمعروفة لي كدوز على راس الرجاء الصالح فجنوب افريقا. طريق جديدة لي معروفة ب North-West Passage.

لمنصور بدا كيشرح كاع حتا كيفاش نهار يتحتلو دوك لمستعمرات، كيفاش يقسموهم بيناتهم، كان يمكن كيفكر فديك طريقة لي صبليون و لبرتغال قسمو بيناتهم لعالم، فلتفاقية لي داروهاعام 1494، لمعروفة ب Treaty of Tordesillas. وكيزيد يشرح لخبرة ديالو لي خداها من لغزو لي دارو لمبراطورية سونغاي جنوب صحرا، كيشرح فيها بلي لمغاربة يقدرو يحاربو فصهد و ظروف لخيبة، وبلي داكشي علاش لمغرب لي خصو يشد و يعمر فهاد لمستعمرات……الخ.
و اقترح على لملكة تسيفط سفير لمراكش باش يناقشو تفاصيل كثر و يسينو على معاهدة واضحة.

لمغرب كان من ديما واعي بداكشي لي كيديروه صبليون و لبرتغال فالغرب لامريكي. كان واحد لبحار سميتو Francis Drake، مشهور فاتاريخ حيت كان ضار على لعالم كامل فطلعة بحرية وحدة بين 1577 و 1580. فاش كان راجع وقف فموغادور. كان دار هجمات قرصنة على بزاف د باطويات د صبليون و لمواني ديالهم ف Peru و لمكسيك…الخ، فاش وقف فموغادور بزاف من داكشي لي غنموه من صبليون فميريكان وصل لسواق د لمغرب.

زيد عليها بزاف د لموريسكيين لي هربو من سبانيا من بعد ثورة Alpujarras كانو كيهربو من لمواني لي شافو فيها دوك لباطويات لي كيجيو من لمستعمرات و كيعاودو شنو شافو. كاع هادشي و بزاف غيرهم كانو كيوصلو لحمد لمنصور و جمع معلومات كافيا على شنو ممكن يربح من شي تحالف مع نكَليز. بصح كان كيبغي كثر يتعاود مع تجار د نكَليز و يعاود معاهم على كيفاش يقدرو يدوزو للثروات د لقارة لميريكانية و حتا للهند بلخصوص و كيفاش يلقاو طريق تخلي لمغرب يوصل للهند بلا ما يدوزو على لأراضي د لعثمانيين…الخ، حمد لمنصور ولا مهوووس يجمع أي جهاز ولا معلومة فداكشي د navigation.

لموهيم، لوفد ديالنا وصل لندن فشهر 9، مرافقينهم بزاف ديال تجار لموهمين فنكَليز ديك ساع لي كانو كيتاجرو مع لمغرب. استقبلاتهم لملكة و سمعات ليهم ف 30 شتنبر، و عاودات استقبلاتهم شي صيمانات من بعد. حضرو لعيد تتويج ديالها ف 27 نونبر و حضرو للحفل ف Whitehallو خصصو ليهم بلاصة مشرفة.

هاد ضيافة كانت شوية فيها مشاكل ديال صراع ثقافات، لوفد لمغربي كان ديما كيبغي ياكل من دبيحة ديالهم هوما ….الخ و شي مشاكل خرا دارو تجار د لندن لي بداو كيطلقو اشاعات بلي هاد لمغاربة جاو غير يتجسسو علينا و يشوفوا اسرارنا فالتجارة.

فديك ست شهور لي كَلسو فلندن، كانو كيجمعو بدكاء و برعاية كبيرة كاع لمعلومات على ثمن و لقياسات و لوزن و نوع ديال سلعة لي كانت كتصدر ولا كستورد فلندن، شراو منهم عينات بزاف. و ركزو بزاف على صناعة د السكر وكيفاش كيستوردوه و منين و شحال كشريوه و شحال كيربحو فيه …الخ و بغاو حتا خرائط ديال لقارة لميريكانية و كيفاش يدوزو لداك North-West Passage لي كيوصل للهند. بزاف د تجار نكَالزة لا حظو بلي هادو متخصصين كثر منهم بعثة دبلوماسية !!!

لوفد لمغربي وصل لندن فواحد لوقت حساس فتاريخ لقتصاد د نكَليز: فشتنبر 1599 شي مية من اكبر تجار د لندن تجمعو باش يأسسو شركة مساهمة ديالهم .(Joint-stock company) نتاخبو لمديرين و لمسؤولين د لمالية ديالها…الخ و كتبو عريضة للملكة:
‘’ for the honour of our native country and for the advancement of trade . . . to set forth a voyage this present year to the East Indies”

وهكا تاسسات لي تعرفات من بعد بشركة الهند الشرقية لي كبرات و ساهمات فتأسيس لمبراطورية لبريطانية من بعد.
ديك لوقيتة كانو نكَليز باقي ما دارو حتا مستعمرة دايما فميريكان، ماكانوش مكتاشفين كيفاش يمشيو معNorth-West Passage و ما كانوش قادرين يختارقو خطوط تجارة لعبيد منطقة لكاريبي زيد عليها فشلو يفتحو خطوط تجارة فلهند فطريق ديال الرجاء الصالح. على عكس لهولنديين لي ديجا كانو خاربينها تجارة فشرق، باطويات هولندية جايا من Java فاندونيسيا عامرة بحوايج غاليين كانو كيوصلو لامستردام، ونكَالزة كانو معصبين بزاف منهم حيت كيحاولو يختارقو حتا تجارة مع لمغرب ويديرو تحالف مع حمد لمنصور.

فلوقيتة لي لوفد لمغربي وصل لندن، شركة لهند شرقية كانو ديجا كيجهزو ل رحلة للهند فطريق د رجاء الصالح باش تخرج ف 1601. هادشي علاش تجار د لندن ما رتاحوش للوفد لمغربي و هو كيدور فسواق و يطقس ويسول على كل حاجة. و لي زاد كفس لأمور، لمطرجم عبد الله دودار، مات فجأة. و لإشاعات بداتك تروج بلي حقا مات بالسم حيت بدا كيتصاحب مع بزاف د تجار نكَليز. موراها صافي لميسيو ديالهم غتسالي، و لوفد غادي يرجعو عوثاني بنفس الطريقة لي جاو بيها: يمشيو على طريق حلب باش ما يعتارضوش ليهم الصبليون.

اترك رد

لن يتم نشر عنوان بريدك الإلكتروني.